Skip to content

IWAK HALILING, UMAI NYAMANNYA….

Juli 18, 2010

Lawas kada bulik ka banua (Pagat Barabai) asa kaganangan awan makanan urang bahari. Banyak jua kalumpanan ngarannya apalagi cara maulahnya atawa manggawinya. Tapi ada nang kada suah kalumpanan: ”iwak haliling” ngarannya. Aku hajin banar makan haliling naya. mun ada sapiring haliling, sikap banar tu pang habis. Kada tahuai mun disambat urang kuluh mahantup, mahantus, atawa mambantas haliling. Nang panting munuh (delicious). Haliling tu sabangsa siput di banyu pahumaan/bandang, bakula wan kalimbuai, atawa gondang jar bubuhan Banjar kuala. kabulujuran di balakang rumah ada pahumaan banih, mamanjang matan Pagat Hulu sampai ka Aluan Mati, Aluan Sumur, Bandang, Libaru, sampai Kahakan. Wayah maunjun dahulu lamun kada bapakulih iwak papuyu, sapat, haruan atawa kulacingan, maka antuk tatap haja ada isinya karna hibak awan haliling nang diipi-i atawa diputiki di sala-sala batang banih.
Kasimpulannya makan tatap haja baiwak, walau iwaknya iwak haliling…
Imbah sampai di rumah, haliling dirandam di banyu agar inya bahira atawa mangaluarakan bulanak atawa lumpur. Tapi amun kada sabar handak makan iwak haliling, maka paraya-ah dirandam, langsung haja hujung burit karungkungnya nang curing nitu dikatipi lawan lading bapandal di atas papan dadamparan. Karungkungnya ditatak supaya daging isinya kawa kaluar wayah kaina dikucup lawan muntung. Tangan kiwa maingkuti haliling, tangan kanan maingkuti lading. Krek..krek…krek…jar bunyi ujung burit karungkung haliling nang ditatak awan lading.
Imbah tuntung mangitipi, haliling tu dibuat ka dalam bakul purun dan di hunjah-hunjah di dalam banyu agar tahi lawan lumpurnya hilangan dan halilingnya barasih atawa kalihatan mancarunung.
Imbahitu, haliling dijarang di dalam panci sampai manggurak banyunya. Parahi santan nyiur. Sasapi awan bawang habang mantah. Sasapi jua awan lumbuk ganal nang anum atawa lumbuk ganal nang habang (tasarah haja). Buati daun pandan atawa pudak sacukupnya. Tambah uyah saparlunya, gula sacukupnya, atau vetsin lamun handak jua. Bisa jua dibuati acan saikit. Rasai dahulu banyu kuahnya, pas haja kah di ilat? Amun sudah asa nyaman di ilat, kuah santannya manggurak dan halilingnya masak, bangkit ha. Buat ka mangkuk atawa piring. Lamun handak parahi ja kuah santannya awan buah limau purut atawa limau nipis. Kambuh kuahnya ka nasi, ambil halilingnya dan kucup….jangan a-asaan mangucup, mun kada daging halilingnya kada kaluar atawa masuk ka munntung, jangan mangucup sambil kapala basarusup ka dalam gumbang atawa tajau kaina bunyi kucupan batambah nyaring, jangan supan kadangaran urang karna di kampung urang-urang makan haliling jua.Cup…cup…daging halililing masuk ka dalam muntung. Mun taumpat jua anak haliling tasulum ta ka dalam muntung, buang haja, karna imbahanu haliling nang ganal bahintaluan atawa baanakan dalam paparutannya. Damintu jua amun tasulum kulipaknya, jangan jua dimakan buang haja. Tapi jangan mambuang kulipak haliling ka lantai kaina tajajak atawa marikit di talapak batis, lamun kulipak marikit di batis, labaram, kaina sambahiyang kada sah marga banyu pa uduan kada rasap ka kulit batis. Cup..cup..cup… umai nyamannya, lih…..jangan takutan habis…banyak haja haliling di pahumaan… mun handak isuk putiki ha pulang. Biar maipi-i atawa mutiki di pahumaan urang, pakacil ampun pahumaan mahija-akan haja atawa cakada manangati. Amun bapadah jua, palingan sidin baucap, “ambil ha!”. Kaitu pang, di kampung ngarannya saraba babarian; saraba ma-ihlasakan. Lain di kuta, saraba manukar..

9 Komentar leave one →
  1. Juli 18, 2010 10:44 am

    Di Sungai Ganal, Salangor wayah bahari ada ai jua haliling di sumur. Tagal kada pati banyak.
    Wayah kakanakan bahari ulun awan kakawanan baulah pupundukan. Haliling tu kami jarang dalam cuntang wadah timbakau rokok…

    Nang mambari lilihan, kami kada tahu buntutnya ditatak saikit. Kami jarang haja…Jadi tuhuk mangucup, tagal kada mau dapat isinya !.

    Wayahni haliling di bandang hudah kada tatamu lagi haliling. Matian kana racun rumpai. Gantinya wayahni di bandang banyak walut. Palawat nang datang ka ‘ homestay jkkk ‘ kami suka banar maunjun walut tu. Amun banyak, kawa haja dijual di pasar..http://homestayjkkk.blogspot.com/

    ha..ha..ha asa lilihan jua ulun mambaca kisah haliling nang karungkung buntutnya kada batatak. Untung haja kada tataguk karna singgancangan mangucup…
    Nah salain iwak haliling, wayah lagi anum ulun katuju jua bakacal di talaga nang karing manangkap haruan atawa papuyu. Lamun manangkap walut lain lagi. Babilah kayu ditajak di tangah talaga atawa sumur nang karing nitu. Imbahitu, tabuk tanah sakuliling babilah sampai ka dasar tanah nang karas tarus baparak ka babilah. Hahujungannya, iwak walut kada kawa bukah dan akhirnya balilit di babilah nitu. Walut kawa jua diunjuni awan banjur. Lubang nang bagarambuak biasanya ada walutnya. Tapi lubang nang karing jangan bawani-wani, bisa ada ular tadungnya. Lubang nang banyunya bagarambuak nitu diunjai awan umpan kalimbuai, tabuan, wanyi atawa iruan. Bila walutnya mahantup rami tu batatarikan. Imbahanu diulur, imbahanu ditarik. Imbah tarikan walutnya pina lamah hanyar digancangi manarik banjurnya…taulihi tu walutnya.

  2. uda permalink
    Juli 21, 2010 2:27 am

    Umai leh, taliur muntung kabila mangganangakan iwak haliling nginto. Amun wayah halui atawa kakanakan dibiasaakan mahantupnya, dida masalah. Sapalih kakawanan kada kawa mahantupnya. Galianan jar. Bibini wayah ini jarang nang taho cara maulahnya.

    Ada kisah, anak bini ulun gin sabujurnya kada suah mahantup haliling. Suah ulun maulah gangan haliling, imbah masak kada dihiraninya. Malihat haliling nang hirang latat, inya pina gair. Panambayan marasai haliling wayah bulik ka banua, inya pinanya asa galianan jua. Tapi wayahini, bila disurungi haliling inya hajin atawa katuju banar, “nyaman, asa iwak katuyung, jarnya”.

  3. syahranie permalink
    Juli 27, 2010 12:40 pm

    Kalu di Banjarbaru, mun handak makan haliling singgah haja di warung Pelangi (bataskota) atawa warung Madina (dimuka Museum).

  4. Juli 31, 2010 4:37 am

    umaa lawas banaar surang ni kada mamakan haliling …eih…sssssttt dasar nyaman …

    saalam ..

  5. galuh permalink
    April 18, 2012 3:29 pm

    Saddaapppp……
    (Y)

  6. galuh permalink
    April 18, 2012 3:31 pm

    Ketuyung pang?????🙂
    (Y)

  7. Indah permalink
    Juni 23, 2013 7:20 pm

    Umai nyamanx leh si haliling tu, d wdh q ne d kapuas ad jua haliling

  8. Mei 11, 2015 3:21 am

    U minta izin mnshare lah mun blih..

  9. LEE permalink
    Maret 19, 2016 3:05 am

    Haliling tu sama wan gondang lah?

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: